İkiqat olimpiya çempionu İvan Yarıginin xatirəsinə həsr olunmuş yarışda Azərbaycan yığması da qüvvəsini sınayıb. Ölkəmizin idman şərəfini Yaşar Əliyev, Namiq Sevdimov (hər ikisi 55 kq), Hacı Əliyev, Ağahüseyn Mustafayev (hər ikisi 60 kq), Emin Əzizov, Cəbrayıl Həsənov (hər ikisi 66 kq), Əşrəf Əliyev (74 kq), Novruz Temrezov (84 kq), Mehman İmanquliyev, Cəmaləddin Maqomedov (hər ikisi 96 kq) və Maksim Proxorov (120 kq) qoruyublar. İdmançı heyətinə baş məşqçi Saypulla Absaidov və məşqçi Aslan Ağayev rəhbərlik edib. Məşqçilər heyəti Azərbaycan Kubokunun nəticələrinə görə qurublar. Belə ki, 4 ildən bir keçirilən yarışda 1-2-ci yerləri tutmuş idmançılar yığmaya cəlb olunublar. Amma onların nəticələri elə də ürəkaçan olmayıb. Qısası, Azərbaycan yığması xatirə turnirində medalsız qalıb. İdmançılarımızdan çoxu elə ilk görüşdəcə uduzaraq, mübarizəni dayandırıblar. Ən yaxşı nəticəni isə 96 kiloqramda güləşən Cəmaləddin Maqomedov göstərib. O, turniri 5-ci pillədə yekunlaşdırmağa müvəffəq olub. “Mini dünya çempionatında” Azərbaycanı hakimlər də təmsil ediblər. AGF-ın Hakimlər Kollegiyasının sədri Əjdər Cəfərov və beynəlxalq dərəcəli hakim Fərəqət Cəlalov bir neçə görüşdə ədaləti təmsil ediblər.